Azərbaycan Kinematoqrafçılar İttifaqının Kino Məktəbinin məzunu, rejissor Türkan Hüseynin “Mən hələ də səninlə danışıram” qısametrajlı sənədli filmi 8-13 oktyabr tarixlərində 66-cı “Dok Leipziq” Beynəlxalq Sənədli Fİlm Festivalında “Ən yaxşı beynəlxalq sənədli film” kateqoriyasında yarışacaq.

TIME rəsmi mənbəyə istinadən bildirir ki, “Çinar film” kino şirkətində istehsal olunan filmin operatoru Türkan Hüseyn, prodüserləri T.Hüseyn, Emil Nəcəfovdur.

“Mən hələ də səninlə danışıram” filmi Azərbaycan Kinematoqrafçılar İttifaqının dəstəyilə ərsəyə gəlib. Rejissor Türkan Hüseynin festivala səfər xərcləri də İttifaq tərəfindən qarşılanır.

Filmin əsas süjeti Türkan Hüseynin rəfiqəsi ilə söhbətini əks edir. Söhbət sevgidən və keçmişə qayıtmaq istəyindən, uşaqlıqdan və onun zaman və məkanda artıq mövcud olmadığı koordinatlarından gedir. Qısa görüşlərlə kəsilən melanxolik dialoq zamanı, baxışlarını və narahatlıqlarını sevgi ilə izah edən, sanki ilişib qalmış insanlar göstərilir. Nazik bir yağ təbəqəsi ilə örtülmüş Xəzər dənizindəki balıqlara baxaraq Türkan Hüseyn: “Əvvəllər burada çirk az idi”, – deyir. “Uşaq olanda hər şey daha az çirkli görünür” deyə rəfiqəsi cavab verir. Film boyu qəhrəmanlar daxili və xarici aləmlər arasında yerdəyişmə edirlər.