Gələcəyin təhsili mövzusunda beynəlxalq forum keçiriləcək

İqtisadi Əməkdaşlıq və İnkişaf Təşkilatının (İƏİT) rəsmi “Twitter” hesabında Bakıda keçiriləcək “Təhsildə yeni çağırışlar” III beynəlxalq forumu barədə məlumat paylaşılıb.

TIME rəsmi mənbəyə istinadən bildirir ki, “Daha təhsilli gələcək” şüarı ilə keçiriləcək beynəlxalq forum rəqəmsal dünyada öyrənmək və qlobal səriştələr mövzularını əhatə edəcək.

Forumda UNESCO-nun Baş direktorunun təhsil üzrə müavini Stefania Giannini,  İƏİT-in Baş katibinin təhsil siyasəti üzrə xüsusi müşaviri, Təhsil və bacarıqlar üzrə direktoru Andreas Şleyxer, Portuqaliya Təhsilin Qiymətləndirilməsi İnstitutunun İdarə Heyətinin sədri, PISA İdarə Heyətinin Portuqaliyadakı təmsilçisi Luiz Pereira dos Santos, Estoniya Təhsil və Tədqiqat Nazirliyinin Ümumtəhsil şöbəsinin məsləhətçisi, ölkənin PISA üzrə koordinatoru Maye Kitsinq, PISA-nın baş analitiki Maryo Piaceçentini, ABŞ Milli Təhsil və İqtisadiyyat Mərkəzinin Baş Tədqiqat üzrə direktoru Tresi Börns, İƏİT-in baş analitiki, Təhsil Tədqiqatları və İnnovasiyalar Mərkəzinin direktor müavini Stefan Vinsen Lankren, İƏİT-nin Təhsil və bacarıqlar şöbəsinin Təhsil Tədqiqatları və İnnovasiyalar Mərkəzində analitik Mark Fuster təqdimatlar edəcəklər.

Beynəlxalq spikerlərin “Öyrənənləri gələcəyə necə hazırlayaq?”, “Gələcəyin məktəbi necə olmalıdır?”, “Təhsili formalaşdıran qlobal trendlər”, “Təhsildə rəqəmsallaşma yekun həlldirmi?” və digər mövzularda çıxışları nəzərdə tutulub.

Qeyd edək ki, beynəlxalq forumda onlayn iştirak üçün 1 noyabr saat 23:00-dək müvafiq linkə keçid edə bilərsiniz: https://bit.ly/3KJjaGh 

Leave a Reply Cancel reply