Azərbaycan İnvestisiya Şirkəti və İsrailin “OurCrowd” şirkəti arasında Strateji əməkdaşlıq sazişi imzalanıb

Azərbaycan İnvestisiya Şirkəti (AİŞ) və İsrailin “OurCrowd” şirkəti iki ölkə arasında texnologiya və biznes əlaqələrini genişləndirmək məqsədilə Strateji əməkdaşlıq sazişi imzalayıblar.

TIME rəsmi mənbəyə istinadən bildirir ki, dəyəri 15 mln. ABŞ dolları olan Saziş AİŞ-in “OurCrowd” şirkətinin startap investisiyalarına birbaşa çıxışına və Azərbaycanda startap şirkətlərinin inkişafına dəstək və mentorluğu təmin etməyə imkan yaradacaq. Sənəddə enerji, səhiyyə, kibertəhlükəsizlik, aqro, qida və təhsil texnologiyaları hədəf sektorları kimi nəzərdə tutulur. Tərəflər arasında 8 il müddətində həyata keçiriləcək əməkdaşlıq Azərbaycan iqtisadiyyatına və texnoloji inkişafa töhfə verəcək.

Məlumat üçün bildirək ki, 2013-cü ildə yaradılan “OurCrowd” şirkəti investorlara və təşkilatlara inkişaf etməkdə olan texnologiya şirkətlərinə sərmayə qoymağa imkan yaradan onlayn qlobal vençur investisiya platformasıdır. “OurCrowd” şirkəti kapitalını 5 qitədə yerləşən 347 portfel şirkətinə və 39 fonda yatırıb. “OurCrowd” bütün sektorlar və mərhələlər üzrə şirkətləri təhlil edir, seçir və sərmayə qoyur. Şirkət 195 ölkədən olan 215 mindən çox qeydiyyatdan keçmiş üzvdən ibarət qlobal platformaya xidmət edir.

Leave a Reply Cancel reply