“Azərbaycanda dövlət qulluğu sistemində islahatlara dəstək” layihəsinin açılışı olub

Avropa İttifaqının (Aİ) maliyyələşdirdiyi və Azərbaycan Respublikasının Dövlət İmtahan Mərkəzinin (DİM) həyata keçirdiyi “Azərbaycanda dövlət qulluğu sistemində islahatlara dəstək” layihəsinin rəsmi açılış tədbiri 14 iyul 2022-ci il tarixində “Fairmont Baku” hotelində baş tutub.

TIME rəsmi mənbəyə istinadən bildirir ki, tədbirdə bir sıra dövlət və özəl qurumların rəhbər şəxsləri, Avropa İttifaqının Azərbaycan Respublikasındakı səfiri və nümayəndələri, həmçinin beynəlxalq ekspertlər daxil olmaqla, ümumilikdə 150-ə yaxın şəxs iştirak edib.

Tədbiri giriş sözü ilə açan DİM-in Direktorlar Şurasının sədri Məleykə Abbaszadə layihənin dövlət qulluğu sistemindəki islahatlara verəcəyi töhfələr, DİM-in dövlət qulluğuna qəbul, qulluqda yüksəliş və xidməti fəaliyyətin qiymətləndirilməsi, davamlı peşəkar inkişaf və fərdi karyeranın planlaşdırılması üzrə imkanlarını necə inkişaf etdirəcəyinə dair məlumat verib. O, DİM ilə Avropa İttifaqı arasındakı digər əməkdaşlıq layihələrindən də söhbət açıb.

Avropa İttifaqının Azərbaycan Respublikasındakı fövqəladə və səlahiyyətli səfiri Peter Mixalko da qonaqları salamlayıb və həyata keçirilən layihənin əhəmiyyətini vurğulayıb.

Dövlət Qulluğunun İdarəetmə Şurasının üzvü, Milli Məclisin deputatı Nizami Səfərov ölkədə bu sahədə həyata keçirilən islahatların vacibliyini vurğulayıb və DİM-in qeyd olunan istiqamətdə fəaliyyətini yüksək qiymətləndirib.      

Daha sonra tədbirdə DİM-in əməkdaşları və beynəlxalq ekspertlər tərəfindən təqdimatlar edilib:

  • Azərbaycan Respublikasında dövlət qulluğu: cari vəziyyət, çağırışlar, islahatlar – Vüqar Əsgərov, Dövlət İmtahan Mərkəzinin Hüquqi təminat və dövlət qulluğu məsələləri şöbəsinin müdiri;
  • Layihənin məzmunu və əsas aspektləri – Edvardas Zukauskas, ekspert komandasının rəhbəri, dövlət qulluğu islahatları və insan resurslarının idarəedilməsi üzrə ekspert;
  • Qiymətləndirmə alətlərinin diversifikasiyası dövlət qulluqçularının seçilməsi prosesinin keyfiyyətinin artırılması və peşəkar inkişafı üçün yeni standartların tətbiqində bir üsul kimi – Pərviz Kazımov, Dövlət İmtahan Mərkəzinin Psixoloji qiymətləndirmə və diaqnostika şöbəsinin müdiri;
  • Dövlət qulluğunda səriştə əsaslı təlimlərin keçirilməsi – Gülzar Quliyeva, İşə qəbul, yüksəliş və fəaliyyətin idarəedilməsi üzrə ekspert;
  • Dövlət qulluğunda İT sahəsindəki innovasiyalar – Süleyman Vəzi, İRİ rəqəmsallaşdırma üzrə ekspert.

Sonda layihənin meneceri, DİM-in Strateji inkişaf şöbəsinin müdiri Vəli Hüseyn layihə çərçivəsində həyata keçirilən və reallaşdırılması planlaşdırılan işlərdən bəhs edib.

Xatırladaq ki, dövlət qulluğu sistemində dayanıqlı islahatların aparılması məqsədilə Azərbaycan Respublikasının Dövlət İmtahan Mərkəzi 2022-ci ilin iyun ayından etibarən Avropa İttifaqının maliyyə dəstəyi ilə iki illik “Azərbaycanda dövlət qulluğu sistemində islahatlara dəstək” layihəsini həyata keçirməyə başlayıb. Layihənin məqsədi təşkilati strukturu və texniki bazanı gücləndirməklə “Azərbaycan Respublikasında 2019-2025-ci illər üçün Dövlət Qulluğunun İnkişafı Strategiyası”nın həyata keçirilməsinə töhfə verməkdir. PROMAN şirkəti və beynəlxalq konsorsium tərəfindən icra edilən layihə Avropa İttifaqının Azərbaycana davamlı dəstəyinin tərkib hissəsidir.

Leave a Reply Cancel reply