Google istifadəçilərin ödəniş məlumatlarının təhlükəsizliyi və məxfiliyi baxımından Chrome-da maraqlı funksionallıq hazırlayır.

TIME xarici mətbuata istinadən bildirir ki, brauzer onlayn mağazalarda malların ödənişi zamanı virtual bank kartı nömrəsindən istifadə etməyə imkan verəcək, eyni zamanda real kartın təfərrüatları tamamilə təhlükəsiz olaraq qalır.

Onlayn ticarət platformalarının saytlarına ödəniş məlumatlarının daxil edilməsi ilə bağlı problem hər kəsə yaxşı məlumdur. Əgər kart məlumatlarını saxlayan belə resurs kibercinayətkarlar tərəfindən sındırılırsa, bütün məlumatlar onların əlinə keçəcək.

Burada onlayn alış-veriş üçün ödəniş edərkən nömrələri əvəz edilə bilən virtual kartlar kömək edə bilər. Ancaq bu gün bütün kredit təşkilatları belə bir fürsət vermir. Google-un məlumatına görə, bu cür virtual kartlar bu yay ABŞ-da buraxılacaq. İndi korporasiya kredit kartı emitentləri və Visa və American Express kimi ödəniş sistemləri ilə birlikdə yeni funksionallığın tətbiqi üzərində işləyir.

Əvvəlcə yenilik Chrome-un masaüstü və Android versiyalarında görünəcək, bir qədər sonra tərtibatçılar iOS istifadəçiləri üçün virtual kart nömrələrini əvəz etmək imkanı əlavə edəcəklər. Google-da Ödənişlər layihəsinə cavabdeh olan Arnold Qoldberq istifadəçilərə virtual kart nömrəsindən istifadə edərək sürətli və problemsiz ödəniş vəd edir.

Brauzer özü CVV nömrəsi daxil olmaqla formaları dolduracaq və siz pay.google.com saytında virtual kartları idarə edə və əməliyyat təfərrüatlarına baxa bilərsiniz.